KOPISUNDUAN DOID WULAN KAAMATAN 2020. |
Tobpinai kou ngaawi, kanou po laid lumongkod doid Kinoingan miampai monongkotoluod tokou kumaa Disido montok koginawaan om koumoligan Dau solinaid kumaa dotokou lolobi no doid timpu koligaganan do podokitan sakit corona sompomogunan poimaso diti. |
Mantad no do koligaganan sakit rapit Korona dilo do oponsol kopio do mi-iso ginawo dotokou do umampayat do laang om kootulan ngaawi koporintaan sompomogunan doid pinggisaman dotokou mongipop do sakit tobingroli dilo. |
Monongkotoluod tokou do au giigina kumaa toinsanan di monogulu dotokou ngaawi doid pisangadan dotokou miampai corona kogungsakit dilo. Montok dotokou, kanou tonudo tokou kootulan ngaawi pinatantu do koporintaan doid pinggisaman dotokou mongipop do sakit koligogon do mantad corona dilo. |
Doid Wulan ko-5, Wulan Kaamatan diti, ounsikou ginawo ku tu abasa om okito tokou maya “WhatsApp” om media ngaawi suwai do kakal poinwakas o sunduan do Kaamatan doid ginawo ngaawi dotokou, sundung ima do amu tokou kaanu tumimung id Hongkod Koisaan mamaantang om mamaramai Wulan om Tadau Kaamatan miagal tikid toun do toun diti sabap no dilo koligaganan podokitan sakit corona. |
Nga i lobi kopongunsikou ginawo ku nopo nga i koimaan ngaawi dotokou do mogitaatabang mogiruurugup monulung tobpinai dotokou di tongosusa dasom timpu kikoligaganan poimaso diti. Montok dilo maganu oku do kosiwatan diti do montongkotoluod au giigina kumaa toinsanan i nagaanan do ginawo monoluod kousinan kumaa “Tabung Kebajikan” do KDCA montok ponulung do panon om waris panon ngaawi KDCA di tongosusa. |
Balakatan, Wanadan om Umoligan tokou no daa ngaawi toriirimo do Kinoingan. |
Kotobian om Kopiwosian Tadau Tagayo Kaamatan 2020. |
Posudongo tokou no ralan koposion kawawagu montok koumoligan om kolidasan dotokou songoowian dasom timpu kikoligaganan diti. |
Back