Lamai kaamatan impoon montok papantod boogizan pomutanaman
Posted on 04. May, 2009 by Allan Dumbong in Kaamatan, KDCA News
PAPAR: Lamai Kaamatan au apatut intangan sabaagi hongkod popogiot hizab pihumaagan om popoinsavat tungkus koubasanan, id sambahik dino nga mositi dodizon impoon papavakas om popoinsavat ponongkiohian boogizan pomutanaman om pomounan ontodonon tanom.
Vozoon Montili Datuk Seri Musa Aman minoboos kalamazan simbolik dino hoohobi nokozo id tinimungan mogiigizon Kadazan Dusun om Murut montok mamalamai kinahantazan mobubuvat nakaanu asil pinomutanaman, nogi ino manifestasi kopotutan boogizan pomutanaman sabaawgi iso mantad boogizan kiguno i kaanu popohuzung kobuuon ikonomi.
“Koponoimaan kalamazan miaga diti nogi atahang kopokito kopolintaan tomoimo osianan do kogunaan, kopokionuan om angkab layat pogun diti”.
“Iti nopo nga angkab om hizab tabaakas kopolintaan montok mongunsub kaampazatan om pilotian layat miampai au moguntob kointutunan tinau, kotumbazaan toi koubasanan montok papahantoi potitikid koponoimaan kalamazan do ozuvon,” ka disido ontok pinopoimagon do lamai Kaamatan nazatan pogun 2009 id Dewan Ginumuan Papar, id doiti di Tadau Kohimo.
Minoboos i Musa hizab pihumaagan i pinalati diti nopo nga kopitanud mimapai pongunsuban Huguan Montili Datuk Seri Najib Tun Razak mazaa konsep “1Malaysia- Rakyat Didahulukan. Pencapaian Diutamakan.”
“Iti saasabap no do potitikid koponoimaan kalamazan i ozuvon dotokou id pogun diti pointantu no do otindapou om pohontozon miampai kaampazatan saviavi tinau om etnik.
“Mantad dino, tokou mositi misokodung mongintong pongozuvan saviavi kalamazan id pogun diti pointatap do aadang, kosudong miampai kopokionuan layat i tomoimo poposoguhu kotoonongon om sinuau,” ka disido.
Minoboos i Musa ontok timpu dimiaga, pongkimamaan mositi poinsavaton montok popointutun toihaan koubasanan kinoizonon kumaa nazatan sompomogunan, tu kogingahan tungkus toihaan koubasanan i nosinganu Sabah nadadi vinakas pamagazat hoohobi no kozo tutumombuhui om tuutulus kaanu manakadai kumaa kababahan pomounan kotombuhuzan pogun.
Lamai kaamatan toimoon ontok ko 30 om 31 Vuhan Kohimo, nga ino poimogonon id timpuunon Vuhan Kohimo montok mananda vuhan kaamatan nokotimpuun.
Nokotindapou nogi id lamai kopomoiganan dino nopo nga kotootohu kumoduvo vozoon montili izioho nopo nga i Datuk Seri Yahya Hussin, Datuk Raymond Tan Shu Kiah om Datuk Seri Joseph Pairin Kitingan sabaagi “Huguan Siou” toi ko buuan tagazo montok mogiigizon Kadazan Dusun.
Source: Bernama, 1/5/2009
